تاکید بر امنیت منطقه و افغانستان در نشست کشورهای مستقل مشترک‌المنافع
شنبه 23 میزان 1401
ولادیمیر پوتین، رییس جمهور روسیه، در نشست کشورهای مستقل مشترک‌المنافع می‌گوید که روسیه در پیکار با هراس‌افگنی با افغانستان کار خواهد کرد.
آقای پوتین در این نشست که در شهر آستانه قزاقستان برگزار شده، همکاری با مقام‌های کنونی افغانستان را نیاز می‌داند و می‌گوید که برای پیشگیری از گسترش هراس‌افگنی در منطقه همکاری خواهد کرد.
ولادیمیر پوتین، رییس جمهور روسیه، گفته است: «ارتباطات میان جهادی‌ها یک تهدید به همه ما است، به یقین که ما نیاز داریم تا با مقام‌های کنونی افغانستان کار کنیم.»
هم‌زمان با این، رییس جمهور ترکمنستان به این باور است که ثبات در افغانستان، امنیت منطقه و مرزها را تضمین خواهد کرد و عشق‌آباد از سازوکارهای بین‌المللی برای برطرف شدن بحران افغانستان پشتیبانی می‌کند.
امام علی رحمان، رییس جمهور تاجیکستان، در این نشست اوضاع در مرز میان افغانستان و تاجیکستان را پیچیده گفته و بر تامین امنیت بیشتر در مرزهای مشترک تاکید ورزیده است.
رییس جمهور تاجیکستان گفته است: «پایگاه در نزدیک تاجیکستان برای گسترش مفکوره افراط‌گرایی ایجاد می‌شود. در میان این روندهای هشداردهنده، اوضاع در اطراف مرز افغانستان و تاجیکستان که بیش از ۶۰ درصد همه‌ی مرزهای آسیای مرکزی را تشکیل می‌دهند، پیچیده شده است. ما در دو سال پسین ۱۷۵ پوسته مرزی در نزدیک افغانستان ایجاد کرده‌ایم، اما این کافی نیست.»
بلال کریمی، معاون سخنگوی امارت اسلامی، گفت: «از خاک ما تهدیدی برای کشورهای دیگر نیست. متوجه مرزهای خود استیم، امنیت مرزهای‌مان را با کشور دیگر به گونه درست تامین کرده‌ایم.»
هم‌زمان با این، رسانه‌های هندی گزارش داده‌اند که اعضای سازمان همکاری شانگهای در یک گام مشترک برای پیکار با هراس‌افگنی در افغانستان، سند همکاری امضا کرده‌اند.
منبع: طلوع نیوز
