طالبان: ۱۵۰۰ مهاجر افغان در پاکستان زندانی‌اند
دوشنبه 28 قوس 1401
سفارت افغانستان در اسلام‌آباد خبر داده است که ۱۵۰۰ مهاجر افغان به شمول زنان، کهن‌سالان، کودکان و بیماران در پاکستان زندانی‌اند.
سفارت افغانستان در اسلام‌آباد، ناوقت روز یکشنبه در رشته توییتی اعلام کرده است که صدها مهاجر افغان در پاکستان زندانی‌اند.
پولیس پاکستان صدها شهروند افغانستان را به علت نداشتن سند قانونی گرفتار و زندانی کرده است.
این سفارت نگاشته است که از میان دو هزار مهاجر افغان که در پاکستان بازداشت و زندانی شده‌اند، تاکنون ۵۰۰ تن آنان رها شده‌اند، اما ۱۵۰۰ تن دیگر آنان به شمول زنان، کودکان، کهن‌سالان و بیماران در زندان‌اند.
در بخشی از این پیام توییتری سفارت آمده است که آنان از چندی به این سو برای حل مشکل شهروندان افغانستان در شهر کراچی ایالت سند پاکستان، چندین بار با مقام‌های وزارت‌های امور خارجه، مهاجرین و مقام‌های پولیس شهر کراچی دیدار و گفت‌وگو کرده‌اند، اما تاکنون در این باره اقدامی نشده است.
پاکستان تاکنون در این باره چیزی نگفته است.
منبع: دویچه وله
