قرارداد برق وارداتی از ترکمنستان به افغانستان تمدید شد
سه‌شنبه 4 دلو 1401
همزمان با تمدید قرارداد تورید انرژی برق از ترکمنستان به افغانستان، تاشکند نیز از سرگیری صادرات برق خود به افغانستان خبر می‌دهد.
«دافغانستان برشنا شرکت» روز دوشنبه گفت که قرارداد تورید برق با شرکت دولتی «ترکمن انرگو » برای سال ۲۰۲۳ را تمدید کرده است.
خبرنامه می‌افزاید که تمدید قرارداد میان مولوی محمد حنیف حمزه رئیس عمومی برشنا شرکت و رئیس ترکمن انرگو در حضور ملا عبداللطیف منصور، سرپرست وزارت انرژی و آب حکومت طالبان، در عشق‌آباد امضا شد.
از سوی دیگر ازبیکستان می‌گوید که صادرات برق خود به افغانستان را به روز چهارشنبه (۲۵ جنوری) از سر می‌گیرد.
وزارت انرژی ازبیکستان می‌گوید: این صادرات به علت عوارض تخنیکی موقتاً قطع شده بود.
جریان برق وارداتی ازبیکستان به افغانستان در ۱۴ جنوری در حالی قطع شد که درجه حرارت به گونهٔ بی‌سابقه در افغانستان تنزیل یافته است.
وزارت خارجه حکومت طالبان در جریان هفته جاری از ازبیکستان خواست که جریان صدور انرژی برق به افغانستان را از سر گیرد.
این در حالی است که شهروندان افغانستان از پرچاوی‌های دوام‌دار شکایت می‌کنند.
افغانستان، بیش از هفتاد درصد برق مورد نیازش را از ازبیکستان، تاجیکستان، ترکمنستان و ایران تأمین می‌کند.
منبع: رادیو آزادی
