وزارت دفاع: تاجیکستان و ازبیکستان چرخبال‌های افغانستان را برگردانند
جمعه 9 سرطان 1402
وزارت دفاع بار دیگر از تاجیکستان و ازبیکستان می‌خواهد که با توجه به اصول همسایه‌گی و روابط دیپلوماتیک، چرخبال‌های منتقل‌شده را به افغانستان برگردانند.
عنایت‌الله خوارزمی، سخنگوی وزارت دفاع با تاکید بر این‌که چرخبال‌های منتقل‌شده از حکومت و مردم افغانستان است، می‌گوید که این چرخبال‌ها را از ازبیکستان و تاجیکستان خواهند گرفت.
عنایت‌الله خوارزمی به طلوع‌نیوز گفت: «ازبیکستان یا تاجیکستان کشورهای همسایه ماست. ما با آنان خواهان روابط نیک هستیم و درخواست ما از آنان این است که با درنظرداشت اصول همسایه‌داری و دیپلوماتیک این را به مردم افغانستان تحویل دهند و هر زمانی که باشد؛ گرفته خواهد شد.»
پیش از این، ایالات متحده امریکا اعلام کرده است که چرخبال‌ها و هواپیمای‌های نظامی دوره جمهوریت را به امارت اسلامی نخواهد داد.
چرخبال‌هایی که به تاجیکستان و ازبیکستان منتقل شده‌اند، از سوی ایالات متحده امریکا خریداری و در اختیار اردوی پیشین کشور قرار داده شده بود؛ اما بربنیاد گزارش‌ها، نزدیک به ۶۰ چرخبال همزمان با سقوط نظام جمهوری، از سوی اردوی پیشین به ازبیکستان و تاجیکستان منتقل شدند.
منبع: طلوع نیوز
