حکومت طالبان به مقام‌های دولت پیشین در افغانستان «کارت مصونیت» می‌دهد
چهارشنبه 8 سنبله 1402
اداره موسوم به «کمیسیون تماس با شخصیت‌ها» که طالبان برای دعوت از چهره‌ها و مقام‌های دولت پیشین تشکیل داده، اعلام کرده که به افراد بازگشته به کشور «کارت مصونیت» می‌دهد.
دفتر معاون سیاسی ریاست الوزرای طالبان گفته است که می‌خواهند «شرایط زندگی مطمئن» برای این افراد را در داخل کشور فراهم کند.
در خبرنامه‌ای که این اداره امروز (۸ سنبله) منتشر کرده، آمده است: «کارت‌های مصئونیت به شماری از اعضای ولسی جرگه (مجلس نمایندگان)، جنرالان و شخصیت‌های علمی اداره پیشین مقیم کشور، از سوی کمیسیون تماس به شخصیت‌های افغان توزیع گردید.»
خبرنامه می‌افزاید: «علاوه بر چهره‌های سیاسی که از خارج از کشور می‌آیند، چهره‌های سیاسی سابق باقی‌مانده در کشور نیز می‌توانند این کارت‌ها را دریافت کنند.»
حامد کرزی، رئیس‌جمهور پیشین، عبدالله عبدالله، رئیس پیشین شورای مصالحه و گلبدین حکمتیار، رهبر حزب اسلامی افغانستان از مهم‌ترین چهره‌های سیاسی پیشین هستند که پس از بازگشت طالبان به قدرت همچنان در کابل ماند‌ه‌اند.
بی بی سی
