مرزبانان تاجیکستان ۷ شهروند افغانستان را تیرباران کردند
جمعه 24 حمل 1403
شفقناافغانستان- منابع محلی می‌گویند که نیروهای مرزی تاجیکستان دست‌کم هفت شهروند کشور را به گلوله بستند که به‌صورت غیرقانونی وارد خاک تاجیکستان شده بودند.
به گزارش خبرگزاری شفقناافغانستان؛ رویداد سه‌شنبه‌شب، ۲۱ حمل در نقطه مرزی افغانستان و تاجیکستان رخ داده است.
منابع روز گذشته تایید کرده‌اند که رویداد پس از آن رخ داده که این افراد از طریق روستای مرزی نوآباد ولسوالی چاه‌آب تخار، وارد خاک تاجیکستان شده بودند.
منابع در تخار می‌گویند که این افراد مواد مخدر قاچاق می‌کردند.
افراد کشته‌شده، باشنده‌گان ولایت‌های تخار و بدخشان هستند و جسد دو تن آنان در ولسوالی چاه‌آب تخار به خاک سپرده شده است.
هویت افراد کشته‌شده هنوز مشخص نیست.
مسئولان محلی طالبان در تخار و طرف تاجیکستان نیز به‌گونه رسمی تاکنون در این مورد اظهار نظر نکرده‌اند.
ولسوالی‌های ماورای کوکچه شامل درقد، دشت قلعه، خواجه‌بهاءالدین، چاه‌آب و خواجه‌غار تخار در شمال‌شرقی کشور با تاجیکستان هم‌مرز هستند.
این در حالی است که دولت تاجیکستان همواره از انتقال مواد مخدر و «اعضای گروه‌های تروریستی» از افغانستان به خاک آن کشور ابراز نگرانی کرده است.
