سفارت افغانستان در چک به مهاجرین و محصلین افغان در اوکراین کمک می‌کند
جمعه ۶ حوت ۱۴۰۰
سفارت افغانستان در پراگ، پایتخت جمهوری چک می‌گوید که به مهاجرین و محصلین افغان که در اوکراین گیر مانده‌اند، کمک می‌کند.
خبرگزاری صدای افغان(آوا) - مانیتورینگ: شهزاد آریوبی، سفیر افغانستان در چک از شهروندان افغانستان در اوکراین خواست تا به شماره‌ٔ اپلیکیشن وتس‌اپ یا ایمیل آدرس سفارت به تماس شده و ثبت نام کنند.
آقای آریوبی به رسانه‌ها گفته است که با وزارت خارجه جمهوری چک و وزارت خارجه جمهوری سلواکیا در تماس بوده و سفرای افغان در اروپا نیز یک گروپ هماهنگی را به هدف کمک برای بیرون کشیدن شهروندان افغان از اوکراین ایجاد کرده‌اند.
آقای آریوبی افزوده که شهروندان افغان در اوکراین می‌توانند با سفارت افغانستان در چک نیز تماس بگیرند تا با کشورهایی که قرار است میزبان آنان باشد، تماس حاصل شود و آنان بتوانند از اوکراین بیرون شوند.
